《哗鬼上学去之 农夫 篇》剧透！5大必睇搞笑位！

《哗鬼上学去》来到第二季，今次由两位香港草根哗鬼大细路陆永同C君出发，大胆撇低Do姐去英国西南部小镇Tavistock做10日寄宿生，亲身体验留学「快乐」生活！不嬲都知道外国小朋友返学其实係由细玩到大，求学不是求分数，以为一定好开心？错！两个都话：「真係惨过做 农夫 呀！」不过农夫出名爱搞笑，留学过程中当然有大量无厘头搞笑事发生，趁今晚开播前先来剧透，率先开估5大必睇搞笑位！

Text: Alex @ A君的泡菜日誌

01 |体育挑机 C君惨变趴街

今次去的Mount Kelly College是英国出名的运动名校，农夫去到第一时间当然要同学生作身体交流，出马前两条友仔劲得戚：「我地两个牛高马大，佢哋成班中学鸡，点会输喎？」可惜事与愿违！陆永挑战传统运动板球，以为手长脚长一定接到波，点知快到连波尾都见唔到，吓到佢以为对方练成「童梦幻影球」；C君话自己下盘结实，走去玩Rugby，可惜Tackle练习目标时已惨变趴街，真係阴公猪！在场监製都睇唔过眼，「哇！你两个玩一阵已经瘦咗一圈喎」，谂住完？你就想！之后仲要游水划艇玩帆船，两个人惨被地狱式训练，陆永最后忍唔住：「嚟留学，麻烦操弗个Body先！」

02 |泥浆步行 老汉推车鬼食泥

英国特种兵传统训练要跑泥浆（Tough Mudder），学校竟然有类似体验，一场去到农夫自然再「中伏」，换上尴尬紧身衣后即跟大队上场，陆永行两步已心知不秒，话好似有10个罗莽师傅捉实你；C君更再次趴街，教练出动都要成5分钟先成功解救，同学仔话原来早前落过雨，泥浆软化劲难行！之后仲要玩「泥上老汉推车」，陆永醒目即举手话要做「老汉」，C君扮车时惨叫，「玩野咩！我咁重手又短，行果阵啲泥高过我个鼻，今舖真係鬼食泥呀！」最后仲大镬，竟然係跳崖，监製见到时层楼高既山崖已叫停，点知两个人心口有个勇字竟然一跃而下，事后边手震边话：「我哋香港过嚟，唔可以衰俾外国小朋友睇！」监製，麻烦颁个奖俾佢哋！掌声！

03 |军服野战 血腥求生吓到面青青

陆永最欣赏外国教育课程，在于佢哋唔止学书本上的知识，而係会教求生技能，好似野外定向堂就係一个例子！当日晨咁早天未光就着好军服集合，同学仔个个都有板有眼，陆永话自己似「刘大卫」，C君更话自己係天生军人，因为佢本名係「郑斯君……人」喎，不过我睇极都觉得佢两个只係似兵仔啰！在劲阴森又方原百里无人的草原行成几个钟就终于见到目的地，教练竟然即刻教大家「处理」野兔，画面血腥睇到佢哋两个差啲反白眼，但在场其他同学非常气定神闲，事后问返先知，「野兔在当时情况只係食物，无得惊！」由细开始接受训练，果然宁舍不同，有胆识！

04 |矇眼画画 斗气玩决裂

Mount Kelly College注意多元发展，上堂出名有创意，估唔到美术堂都有新花臣，竟然係矇眼画画锻练团队精神。陆永C君话晒都组团农夫超过15年，当然未惊过，C君矇眼后陆永即刻开始，可惜搞笑瘾发作，当然乱噏当秘笈，「哇！你画得好好呀！只猫画到好似狗咁；隔离仲有个花樽，点解你画到宝矿力咁？」真係画到C君扯埋火，连老师都出马叫佢正经啲！最后？两幅画当然都一塌胡涂，老师评价F级，毫无合作精神！唔通佢哋不和争Do姐宠係真既？

05 | 收买人心 宿舍玩国粹输俾同学仔

去留学，同学仔最怕宿舍新朋友难相处，农夫在节目中懒醒俾贴士，就话一定要作深文化交流，搞烂Gag教广东话已属低手表现，识玩一定係玩国粹打麻雀，「麻雀边打边吹水，打赌赢咗叫可以叫佢做你手下，好化算」，点知外国朋友仔鬼咁醒目一点就明，即使农夫集精汇神，陆永仲心思思想出古惑，可惜都係一句「食糊」惨被KO，不过气氛超融洽，监製都讚农夫搭讪係有一手，值得学习！

终极剧透：Do姐现身！

「想卖甩Do姐？无咁易」，Do姐竟然现身毕业典礼，吓死佢哋！农夫当然受宠若惊，陆永仲话「我要一世侍奉Do姐」！期间Do姐仲做咗个惊喜Event，可惜监製话要卖个关子，想睇佢哋3个再斗气，唯有较闹钟準时睇节目吧！

 

《哗鬼上学去之农夫篇》

日期：至23日晚上10时30分（共5集）

频道：翡翠台